Фото: Тошкентдаги автотураргоҳ ходимларининг ҳайдовчиларни хурсанд қилган ташаббуси

Чилонзор буюм бозори («Отчопар»)даги автотураргоҳлардан бирининг ходимларидан чиққан ташаббус Facebook’даги «Водители Ташкента (Drivers.uz)» гуруҳи аъзолари олқишига сазовор бўлди.

«Жазирамада машинамни бозор ёнида қолдирган эдим. Қайтиб келиб, ҳайрон қолдим: автотураргоҳ ходимлари барча автомобилларнинг олд ойналарини картон қоғоз билан ёпиб чиқибди. Баракалла!», — деб ёзган хабар муаллифи.

Хабарга илова қилинган суратда автотураргоҳдаги автомобилларнинг олд ойналари картон қоғоз ва бошқа воситалар ёрдамида ёпиб чиқилганини кўриш мумкин.

Фотохабар остида фикр билдирган фойдаланувчиларнинг кўпчилиги мазкур ташаббусни олқишлаган, бу хабардан кўнгли кўтарилганини маълум қилган.

Бир гуруҳ фойдаланувчилар эса: «Уларнинг бу хизматига ортиқча минг сўм берсанг ҳам арзийди», — қабилида фикрлар ёзиб қолдирган.

Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.