Facebook’даги «Водители Ташкента (Drivers.uz)» гуруҳида эълон қилинган йўловчи эшиклари юқорига очиладиган Chevrolet Cobalt’нинг сурати қизғин баҳс-мунозараларга сабаб бўлди.
Бир қатор фойдаланувчилар автомобиль эшикларини қаерда ва неча пулга шундай қилиш мумкинлигига қизиққан.
Фойдаланувчилардан бири: «Автомобильини гаражга қўядиганлар учун бу ноқулай ечим», — деб ёзган бўлса, бошқаси: «Тиқилинч автотураргоҳларнинг ичида бундай эшик — айни муддао», — деб фикр билдирган.
Айни вақтда, бир гуруҳ фойдаланувчилар бу олифтагарчиликдан бошқа нарса эмас, қабилида изоҳлар ёзиб қолдирган. «Бунинг ҳеч қандай қулайлиги йўқ, турган-битгани хўжакўрсинга», — деб ёзади гуруҳ аъзоларидан бири.
Бошқа бир фойдаланувчи эса шундай фикр билдирган: «Бунинг нимаси ёмон? Липиллайдиган стоп-сигналдан бир неча бор яхшироқ-ку? Бу худди 18—20 дюймли ғилдиракларга ўхшайди — ноқулай ва бефойда, бироқ қандай чиройли!».
Эшиги юқорига очиладиган Chevrolet Cobalt’нинг суратини эълон қилган фойдаланувчи кейинроқ Nexia ва Lacetti’нинг ҳам шундай суратларини илова қилган.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)