Ўзбекистонга олиб кирилаётган болалар ўйинчоқлари ва ўйинлар мажбурий тартибда сертификатланадиган товарлар турига киради. Яқинда пойтахт божхона ходимлари томонидан шу турдаги бир нечта божхона қоидабузарликлари фош қилинди. Бу ҳақда Тошкент шаҳар божхона бошқармаси ахборот хизмати «Дарё»га маълум қилди.
Жумладан, Тошкент шаҳар божхона бошқармасининг «Тошкент-товар» ташқи иқтисодий фаолият божхона пости ходимлари томонидан Тошкентда фаолият юритаётган корхоналардан бирининг номига хориждан темир йўл контейнерида келтирилган юклар ўрнатилган тартибда божхона кўригидан ўтказилганда, мазкур товарларга тегишли божхона юк декларацияси ва йўл-юк кузатув ҳужжатларида қайд қилинмаган, қиймати салкам 4,5 миллион сўмлик 6 турдаги 504 дона болалар ўйинчоғи яширин равишда олиб киришга уринганлиги аниқланди.
Мазкур постда аниқланган шунга ўхшаш яна бир ҳолатда эса, якка тартибдаги тадбиркор номига хориждан келтирилган юклар божхона кўригидан ўтказилганда, унда божхона юк декларацияси ва бошқа ҳужжатларда қайд қилинган миқдоридан ортиқча бўлган 37,1 миллион сўмлик 3 903 дона болалар ўйинчоғи олиб кирилгани фош бўлди.
Ҳозирда мазкур ҳолатлар юзасидан божхона суриштирувлари ва текширув жараёнлари давом эттирилмоқда.
Изоҳ (0)