GM Uzbekistan ўз фаолияти ҳақидаги ОАВ хабарларини яна бир бор рад этди

GM Uzbekistan компанияси бир қатор оммавий ахборот воситалари томонидан Ўзбекистон автомобилсозлик саноати атрофидаги вазиятга бағишланган чиқишларга жавобан навбатдаги баёнотни тарқатди. «Газета.uz»нинг ёзишича, баёнотда «нотўғри ва мутлақо ёлғон маълумотлар» рад этилган ва «йирик саноат корхоналаридан бирини обрўсизлантиришга қаратилган ҳаракатлар» тўхтатилишига умид билдирилган.

«GM Uzbekistan’нинг бошқаруви замонавий корпоратив услуб ва стандартлар асосида амалга оширилади. ‘Ўзавтосаноат’ акциядорлик компанияси раҳбарияти кузатув кенгашидаги иштироки орқали General Motors вакиллари билан биргаликда қўшма корхонани ривожлантиришнинг стратегик йўналишларини белгилашда қатнашади ва GM Uzbekistan’нинг кундалик операцион фаолияти билан шуғулланмайди», — дейилади баёнотда.

Баёнотда қайд этилишича, GM Uzbekistan автомобиль ишлаб чиқарувчи ҳисобланади ва «на Ўзбекистон ичида, на ундан ташқарида автомобилларни реализация қилиш билан шуғулланади. Автомобильлар реализацияси ваколатли дистрибьюторлик ташкилотлари томонидан амалга оширилади».

«Умум қабул қилинган жаҳон амалиётига кўра, дистрибьюторлик ташкилотлари турли тижорат банклари ва молия ташкилотларининг кредитлари ва қарз маблағларини жалб қилиш орқали савдони молиялаштириш фаолиятини амалга оширади. Бундан ташқари, савдони молиялаштириш учун дистрибьюторлик ташкилотлари фақат қонуний, умум қабул қилинган механизм ва воситалардан фойдаланади. Айни вақтда, турли мақолаларда Ўзбекистон Миллий банки бундай келишувларнинг кафили бўлгани ҳақидаги таъкидлар ҳақиқатга тўғри келмайди», — дейилади компания баёнотида.

«GM Uzbekistan’нинг Россиядаги амалдаги дистрибьюторлари — ‘УзДЭУ Авто Воронеж’ ва ‘Узавто Рус’нинг таъсисчилари таркибида бирор-бир хусусий шахс йўқ. ‘Ўзавтосаноат’ АК, GM Uzbekistan ёки уларга боғлиқ компаниялар бир қатор оммавий ахборот воситалари томонидан эълон қилинган мақолаларда тилга олинган ‘Академия УзДЭУ’ компанияси муассиси ҳисобланмайди, академиянинг ўзи эса ‘Ўзавтосаноат’ АК билан ҳам, GM Uzbekistan билан ҳам ҳеч қандай шартномавий ёки бошқа муносабатларга эга эмас», — дейилади баёнотда.

Бир қатор мақолаларда Ravon’нинг Россиядаги ваколатхонаси маркетинг департаменти директори Елена Кузнецовага ҳавола берилган. Унинг сўзларига кўра, Ўзбекистон автосаноати атрофидаги вазият борасида у айтган, деб кўрсатилаётган сўзлар тўлиқ бузиб кўрсатилган.

«Журналист этикаси йўқлигидан, айтган фикрларим бутунлай бошқа йўсинда талқин қилингани ҳамда ҳаёт ҳақиқатидан мутлақо узилган ва, катта эҳтимол билан, вазиятни беқарорлаштириш учун ўйлаб топилган мақсадли мақола кўринишида тақдим этилганидан аччиқландим», — деди Елена Кузнецова.

«Аввал экспорт учун юкланган ва Ўзбекистонга ноқонуний йўллар билан қайтариб олиб келинган автомобилларни ички бозорда сотиш ‘схемаси’ ҳамда қўшни мамлакатлардаги чегарадош ҳудудларда бундай мақсадларда фойдаланиладиган «тиндиргичлар» борлиги ҳақидаги хабарларни яна бир бор тўлиқ рад этамиз. Бу билан нафақат GM Uzbekistan, балки давлат бошқарувининг бошқа органлари ҳам мутлақо асоссиз равишда айбланмоқда», — дейилади компания матбуот хизмати баёнотида.

«Экспорт-импорт операцияларини рўйхатга олиш ва ҳисобини юритиш, шунингдек, банк ва божхона назорати тизимлари автоматлаштирилганидан келиб чиқиб, экспорт учун деб кўрсатилган автомобилларни ички бозорда реализация қилиш бўйича хабарларда тилга олинган сохта схемаларнинг на амалий, на назарий жиҳатдан мавжуд бўлишига имкон йўқ», — дейилади GM Uzbekistan баёнотида.

• GM Uzbekistan заводнинг ёпилгани ва ходимлар ҳибсга олингани ҳақидаги миш-мишларни рад этди