ЮНЕСКОнинг Жаҳон мероси қўмитаси Қашқадарё вилоятидаги Шаҳрисабз шаҳрининг тарихий марказини хавф остида бўлган жаҳон мероси объектлари рўйхатига киритди, дея хабар бермоқда «Газета.uz» ташкилот сайтига таяниб.
Бундай қарор қўмитанинг 10—20 июль кунлари Истанбулда бўлиб ўтаётган 40-сессиясида Шаҳрисабз тарихий марказида «сайёҳлик инфратузилмаси ҳаддан ташқари ривожлантирилиши» туфайли қабул қилинди, дейилади хабарда.
Ёши 2000 йилдан ошадиган Шаҳрисабз тарихий маркази ЮНЕСКОнинг Жаҳон мероси объектлари рўйхатига 2000 йилда киритилган. Бу ердаги меъморий ёдгорликлар ва бутун бир қадимий даҳалар Амир Темур ва Темурийлар ҳукмронлиги даврига тегишли.
13 июль куни бўлиб ўтган мажлисда Жаҳон мероси қўмитаси «Жаҳон мероси объектининг ўрта асрларга тааллуқли даҳалари марказидаги биноларнинг бузилиши ва замонавий объектлар, жумладан, меҳмонхоналар ва тарихий Шаҳрисабзнинг ташқи қиёфасига ортга қайтариб бўлмайдиган ўзгартириш киритган бошқа бинолар қурилиши» юзасидан хавотир билдирди, дейилади хабарда.
Изоҳ (0)