Газ-баллон ускунаси ўрнатилган Lacetti’ларнинг Ўзбекистондаги савдоси кузда бошланади

Сиқилган газ (метан)да ишловчи газ-баллон ускунаси билан таъминланган Lacetti автомобилларининг Ўзбекистондаги савдоси кузда бошланади. Бу ҳақда, GM Uzbekistan компанияси матбуот хизматига асосланиб, «Газета.uz» хабар бермоқда.

GM Uzbekistan заводида ўрнатилаётган газ-баллон ускуналари Италиянинг Фабер компанияси (баллонлар) ва «Ўзавто-Ланди Рензо» Ўзбекистон—Италия қўшма корхонаси (капотости ускуналари) томонидан етказиб берилмоқда.

ГБУни бирламчи ўрнатиш, двигателнинг қуввати ва айланма вақтини аниқлаш бўйича синовлар, шунингдек, газ тизимини бошқариш бўйича электрон блок калибровкаси Landi Renzo (Италия) компанияси томонидан амалга оширилди.

Автомобильнинг параметрик синовлари ва кучайтирилган двигателнинг ресурс синовлари GM Korea томонидан ўтказилди, Ўзбекистонда эса умумий йўл юриши 30 минг километрга тенг тезлаштирилган ресурс синовлари бўлиб ўтди.

Lacetti’га ўрнатилган тизим ECE R110 (БМТнинг Европа Иқтисодий комиссияси) талабларига жавоб беради ва General Motors корпорацияси томонидан тасдиқланган. Шунингдек, автомобиль учун «Ўзстандарт» агентлиги сертификати ҳам олинган.

Ўрнатилаётган 4-авлод газ-баллон ускунаси ҳажми 90 литр бўлиб, двигателдаги ҳарорат Цельсий бўйича 40 даражадан ошса ёки газ захираси тугаса, машина автоматик равишда бензинда ҳаракатланишга ўтади. Бир марта газ ёнилғиси билан тўлиқ тўлдирилган бундай Lacetti соатига 90 километрлик тезликда 280 километргача, шаҳар ичида эса 230 километр йўл боса олади.

Машина GM PowerTrain Uzbekistan’нинг газда ишлашга мослаштирилган ҳажми 1,5 литрли двигатели билан таъминланган. Капотости газ ускуналари эса манометр, юқори босим газ қувурчалари, газ фильтри, босим датчиги мавжуд газ инжектор тахтачаси, ёнилғи қуйиш қурилмаси, газ редуктори ва газ тизимини бошқариш бўйича электрон блокдан иборат.

Автомобильнинг хавфсизлигига алоҳида эътибор қаратилган. GM Uzbekistan вакилларининг қайд этишича, мазкур автомобилни ишлаб чиқаришнинг барча босқичларида қатъий сифат назорати ўрнатилган, газ сизиб чиқиши ва бошқа барча тизимлари изчил текширилади. Автомобильга, газ-баллон ускунаси билан бирга, 1 йиллик ёки 20 минг километр масофа босиб ўтгунича кафолат берилади.

Автомобильни сотиб олиш вақтида мижозга барча зарур ҳужжатлар: газ баллонларнинг мувофиқлик сертификати ва капотости ускуналари (редуктор, клапан в манометр)нинг мувофиқлик сертификати нусхалари, ГБУ ўрнатилгани ҳақида баённома ва машинага ГБУ ўрнатилгани ҳақида қайд киритилган ҳисобварақ-маълумотнома тақдим этилади.

SX / MT комплектациясидаги Chevrolet Lacetti автомобили 32 001 500 сўмдан, CDX / MT комплектациясидаги Lacetti эса 37 126 630 сўмдан савдога чиқарилади. Автомобильлар учун тўлов халқаро тўлов карталари орқали Марказий банкнинг тўлов кунидаги курси бўйича қабул қилинади.

«Харидорлар GM Uzbekistan’нинг барча дилерлик корхоналарида автомобиль учун олдиндан буюртмаларни расмийлаштириши мумкин», — дейилади «Газета.uz» хабарида.