Тошкентда йўлнинг иккинчи ҳаракатланиш бўлагида тўхтаб турган инкассация хизматига тегишли Captiva автомобили Facebook’даги «Водители Ташкента» гуруҳида баҳс-мунозараларга сабаб бўлди.
«Мана улар қандай тўхтаб туришади. Иккинчи ҳаракатланиш бўлагида», — деб фотохабар қолдирган фойдаланувчининг қайд этишича, инкассация хизмати автомобили шу туриши билан ҳаракатнинг бошқа иштирокчиларига, хусусан, сурат муаллифига ҳам халал берган.
Сурат остида фойдаланувчилар қизғин мунозарага киришган. Гуруҳнинг баъзи аъзолари инкассация хизматига тегишли автомобиллар Йўл ҳаракати қоидаларини мунтазам равишда бузишидан нолиган бўлса, бошқа бир гуруҳ фойдаланувчилар инкассаторларга бундай ҳаракатлар учун рухсат берилганини таъкидлаган.
«Улар атиги бир неча ўн сонияга тўхтаб туради, холос. Бир жойда узоқ ушланиб қолмайди, шундай экан, уларга мумкин», — деб ёзган фойдаланувчилардан бири. Бошқаси эса, киноя билан: «Captiva бўлганидан кейин, мумкин бўлади-да!», — деб фикр қолдирган.
Маълумот учун, Йўл ҳаракати қоидаларининг 88-бандига кўра, транспорт воситаларига йўлнинг ўнг томони ёқасида, у бўлмаганда эса қатнов қисмининг четида тўхташ ва тўхтаб туришга рухсат этилади. Маъмурий жавобгарлик тўғрисидаги кодекснинг 128-6-моддаси 1-қисмига мувофиқ, ҳайдовчиларнинг тўхташ ёки тўхтаб туриш қоидаларини бузиши энг кам иш ҳақининг уч баравари (8 июль ҳолатига кўра — 390 720 сўм) миқдорида жарима солинишига сабаб бўлади.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)