Siqilgan gaz (metan)da ishlovchi gaz-ballon uskunasi bilan ta’minlangan Lacetti avtomobillarining O‘zbekistondagi savdosi kuzda boshlanadi. Bu haqda, GM Uzbekistan kompaniyasi matbuot xizmatiga asoslanib, “Gazeta.uz” xabar bermoqda.
GM Uzbekistan zavodida o‘rnatilayotgan gaz-ballon uskunalari Italiyaning Faber kompaniyasi (ballonlar) va “O‘zavto-Landi Renzo” O‘zbekiston—Italiya qo‘shma korxonasi (kapotosti uskunalari) tomonidan yetkazib berilmoqda.
GBUni birlamchi o‘rnatish, dvigatelning quvvati va aylanma vaqtini aniqlash bo‘yicha sinovlar, shuningdek, gaz tizimini boshqarish bo‘yicha elektron blok kalibrovkasi Landi Renzo (Italiya) kompaniyasi tomonidan amalga oshirildi.
Avtomobilning parametrik sinovlari va kuchaytirilgan dvigatelning resurs sinovlari GM Korea tomonidan o‘tkazildi, O‘zbekistonda esa umumiy yo‘l yurishi 30 ming kilometrga teng tezlashtirilgan resurs sinovlari bo‘lib o‘tdi.
Lacetti’ga o‘rnatilgan tizim ECE R110 (BMTning Yevropa Iqtisodiy komissiyasi) talablariga javob beradi va General Motors korporatsiyasi tomonidan tasdiqlangan. Shuningdek, avtomobil uchun “O‘zstandart” agentligi sertifikati ham olingan.
O‘rnatilayotgan 4-avlod gaz-ballon uskunasi hajmi 90 litr bo‘lib, dvigateldagi harorat Selsiy bo‘yicha 40 darajadan oshsa yoki gaz zaxirasi tugasa, mashina avtomatik ravishda benzinda harakatlanishga o‘tadi. Bir marta gaz yonilg‘isi bilan to‘liq to‘ldirilgan bunday Lacetti soatiga 90 kilometrlik tezlikda 280 kilometrgacha, shahar ichida esa 230 kilometr yo‘l bosa oladi.
Mashina GM PowerTrain Uzbekistan’ning gazda ishlashga moslashtirilgan hajmi 1,5 litrli dvigateli bilan ta’minlangan. Kapotosti gaz uskunalari esa manometr, yuqori bosim gaz quvurchalari, gaz filtri, bosim datchigi mavjud gaz injektor taxtachasi, yonilg‘i quyish qurilmasi, gaz reduktori va gaz tizimini boshqarish bo‘yicha elektron blokdan iborat.
Avtomobilning xavfsizligiga alohida e’tibor qaratilgan. GM Uzbekistan vakillarining qayd etishicha, mazkur avtomobilni ishlab chiqarishning barcha bosqichlarida qat’iy sifat nazorati o‘rnatilgan, gaz sizib chiqishi va boshqa barcha tizimlari izchil tekshiriladi. Avtomobilga, gaz-ballon uskunasi bilan birga, 1 yillik yoki 20 ming kilometr masofa bosib o‘tgunicha kafolat beriladi.
Avtomobilni sotib olish vaqtida mijozga barcha zarur hujjatlar: gaz ballonlarning muvofiqlik sertifikati va kapotosti uskunalari (reduktor, klapan v manometr)ning muvofiqlik sertifikati nusxalari, GBU o‘rnatilgani haqida bayonnoma va mashinaga GBU o‘rnatilgani haqida qayd kiritilgan hisobvaraq-ma’lumotnoma taqdim etiladi.
SX / MT komplektatsiyasidagi Chevrolet Lacetti avtomobili 32 001 500 so‘mdan, CDX / MT komplektatsiyasidagi Lacetti esa 37 126 630 so‘mdan savdoga chiqariladi. Avtomobillar uchun to‘lov xalqaro to‘lov kartalari orqali Markaziy bankning to‘lov kunidagi kursi bo‘yicha qabul qilinadi.
“Xaridorlar GM Uzbekistan’ning barcha dilerlik korxonalarida avtomobil uchun oldindan buyurtmalarni rasmiylashtirishi mumkin”, — deyiladi “Gazeta.uz” xabarida.
Izoh (0)