ИШИД йил бошидан буён Ироқ ва Суриядаги ҳудудининг 12 фоизини йўқотди

ИШИД террорчилик гуруҳи 2016 йилнинг биринчи ярми давомида Ироқ ва Суриядаги ўз ҳудудларининг 12 фоизи устидан назоратни йўқотди, дея хабар бермоқда «Интерфакс» Британиянинг IHS тадқиқот компанияси маърузасига таяниб.

Шу тариқа, таҳлилчилар таъкидлашича, террорчилар ўтган йилдаги кетма-кет йирик мағлубиятлардан сўнг кучини қайта тиклай олмаган.

Олиб борилган ҳисоб-китобларга кўра, 2015 йилда ИШИД ҳудуди 12,8 минг квадрат километрга қисқарган, бу 14 фоиз демакдир. 2016 йил 4 июль ҳолатига кўра, ИШИД Ироқ ва Сурияда тахминан 68,3 минг квадрат километр ҳудудни назорат қилади.

IHS таъкидлашича, ИШИД даромадлари ҳам сезиларли даражада камайган. 2015 йил ўрталарида у ойига тахминан 80 миллион долларни, 2016 йил мартида эса 56 миллион долларни ташкил этган.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.