ИШИД Ироқ армиясининг Мосул шаҳри жанубидаги Ал-Кияра аҳоли пункти йўналишида ҳаракатланишига тўсқинлик қилиш мақсадида бир неча нефть қудуқларига ўт қўйди. Бу ҳақда «Газета.ru» хабар бермоқда.
Sky News Arabia телеканалига кўра, террорчилар мазкур аҳоли пунктига олиб борувчи барча йўлларни миналаштирган. Улар шу тариқа Мосул остонасида жангариларни йўқ қилиб келаётган ироқлик ҳарбийларни тўхтатиб қолишга ҳаракат қилмоқда. Олдинроқ ҳукумат кучлари Ал-Кияра ҳарбий-ҳаво базасини эгаллашга муваффақ бўлганди.
Мосулнинг озод қилиниши ҳозирда Ироқ ҳарбийларининг асосий мақсади бўлиб турибди. Шаҳар 2014 йил июнидан бери ИШИД назоратида бўлиб турибди, жангарилар уни ўзларининг Ироқдаги пойтахти ҳисоблайди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)