АҚШ Марказий разведка бошқармаси директори Жон Бреннан ИШИД экстремистик гуруҳи террорчилари томонидан АҚШда 28 июнь, сешанба куни Туркияда содир этилганидек теракт режалаштирилаётгани эҳтимолини истисно қилмади, деб ёзади «ТАСС».
«Агар ИШИД бундай ҳужумни АҚШда уюштиришга уринмаса, таажжубда қоламан, — деди у. — Туркия аэропортида содир бўлган ҳодисага қаранг, у ерда портловчи моддали камарлардан фойдаланишди, уларни тайёрлаш унчалик қийин эмас».
Шу билан бирга, Бреннан теракт ортида айнан шу гуруҳ жангарилари турганини шунчаки тахмин қилди, холос. «ИШИД одатда терактларни худкушлар иштирокида амалга оширади», — дея аниқлик киритди у ИШИДнинг чет элда ҳужумлар уюштириши эҳтимолига хавотир билан ёндашишини таъкидлар экан.
Эслатиб ўтамиз, Туркиянинг Истанбул шаҳридаги Отатурк номли халқаро аэропортда содир этилган теракт оқибатида ҳаётдан кўз юмганлар сони 43 нафарга етгани ҳамда улар орасида Ўзбекистон фуқароси борлиги ҳақида хабар берилганди. Жароҳатланганлар сони 147 кишини ташкил қилмоқда.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)