Бразилиялик ҳужумчи Халк «Зенит»ни таркиб этиб, Санкт-Петербургни Шанхайга алмаштирди

Бразилиялик ҳужумчи Халк Хитойнинг «Шанхай SIPГ» клуби билан шартнома имзолади, деб хабар берди ОФКнинг Twitter’даги саҳифаси.

2012 йилдан буён Санкт-Петербургнинг «Зенит» клуби шарафини ҳимоя қилган футболчи Хитойдаги тиббий кўрикдан муваффақиятли ўтди. «Championat.asia»нинг манбааси кўрсатилмаган норасмий маълумотига кўра, «Зенит» бу трансфердан 55 миллион евро ишлаб олган.

Россия Премьер-лигасининг якунига етган 2015/16 йилги мавсумида Халк «Зенит» сафида 27 учрашувда иштирок этиб, 17 та гол уришга муваффақ бўлган, шунингдек, 16 та голли пас оширган.

Халк Шанхай клубига қадар ҳам Осиё қитъасида тўп сурган. У 2005 йил Япониянинг «Кавасаки Фронтале» клуби сафига Бразилиянинг «Витория»сидан етиб келганди. Кейинроқ у «Консадоле Саппоро», «Токио Верди» жамоаларда ҳам 1 йилдан тўп тепди. Шу йўл орқали Португалиянинг «Порту» клубига бориб қўшилди.

Халкнинг янги жамоаси «Шанхай SIPГ» Хитой Супер Лигасининг биринчи давраси якунларига кўра 16 жамоа орасида 4-ўринни эгаллаб турибди.