АҚШнинг Техас штати Пенхэндл шаҳри яқинида иккита юк поезди тўқнашиб кетиши оқибатида кучли ёнғин юзага келди, дея хабар бермоқда «ТАСС». Ҳукумат шаҳарча аҳолисини эвакуация қилишга мажбур бўлди.
Машинистлардан бири локомотивдан ўз вақтида сакраб тушиб, омон қолди, унинг уч ҳамкасбининг тақдири, ҳамон давом этаётган ёнғин туфайли, ҳозирча номаълум.
Маълумотларга кўра, поездлар битта темир йўл бўйлаб, бир-бирига қараб ҳаракатланган, ҳалокат натижасида вагонларнинг катта қисми рельслардан чиқиб кетган, уларнинг бир қисми ёниб кетган. Терговчилар тезлик соатига 112,7 километргача чекланган ҳудудда иккала поезд қандай тезликда ҳаракатланганини аниқламоқда.
АҚШнинг Транспортда хавфсизлик миллий бошқармаси ҳалокат рўй берган вазият пухталик билан ўрганила бошлаганини маълум қилди. Тўқнашув юз берган йўл қисмида GPS, радиостанция ва компьютерларни ёқадиган, поездлар ҳаракати устидан назорат тизими ўрнатилмагани аниқланди. Ушбу PTC тизими ноқулай об-ҳаво ёки таъмирлаш ишлари бораётган йўл ҳудудларида тезликни автоматик тарзда пасайтириш имконини беради.
Изоҳ (0)