Шу йилнинг 2 июнь кунига белгиланган Ўзбекистон – Экваториал Гвинея халқаро ўртоқлик учрашуви Экваториал Гвинея футбол федерациясининг ташаббусига кўра бекор қилинди, деб хабар бермоқда Ўзбекистон футбол федерацияси матбуот хизмати.
Экваториал Гвинея футбол федерацияси бош котиби Тадео Нсуе Онва имзолаган хатда айтилишича, Африка Конфедерациясининг йўриғига кўра Африка Миллатлар Кубогининг саралаши доирасида ўтказилиши керак бўлган Экваториал Гвинея – Бенин ўйини 3 июнь куни ўтказилиши мумкин. Шу сабабли, Экваториал Гвинея Ўзбекистон терма жамоаси билан ўртоқлик учрашувини ўтказиш учун Тошкентга кела олмаслигини маълум қилди.
«Биз Ўзбекистон футбол федерациясидан узр сўраймиз ва ушбу ўйиннинг яқин вақт ичида ўтказилишига умид қилиб қоламиз», – дейилади Экваториал Гвинея футбол федерацияси бош котибининг йўллаган мактубида.Аввалроқ Экваториал Гвинея термаси Тошкентга 20 нафар футболчи билан келиши, шунингдек, «Бунёдкор» стадионида бўлиб ўтиши керак бўлган мазкур учрашувга чипталар сотувга чиққани ҳақида хабар берилганди.
Ўзбекистон футбол федерацияси Ўзбекистон ва Экваториал Гвинея ўртасидаги учрашувга сотилган чипталарни қайтариб олиш масъулиятини ўз бўйнига олади.
Эслатиб ўтамиз, 13 май куни Ўзбекистон футбол федерацияси Ўзбекистон миллий терма жамоаси 2 июнь куни Тошкентда Қирғизистон билан ўртоқлик ўйини ўтказиши ҳақида хабар берганди. Аммо бу учрашув кейинроқ бекор қилинди. Қирғизистон футбол федерациясининг Facebook’даги расмий саҳифасига таяниб, «Championat.asia»нинг хабар беришича, учрашув Ўзбекистон томони ташаббуси билан бекор қилинганди.
Маълумот учун, 4 июнь куни Самвел Бабаян шогирдлари Австриядаги йиғинга жўнаб кетади ва у ерда 7 июнь куни Канада термасига қарши майдонга тушади.
Изоҳ (0)