Дунёдаги биринчи ахборот агентлиги асосчисининг соати кимошди савдосида 3 млн долларга сотилди

AFP агентлигининг «аждоди», дунёдаги илк ахборот агентлиги — «Гавас» асосчиси Шарль-Луи Гавасга тегишли бўлган соат 16 май куни Женевада ўтказилган кимошди савдосида 3,245 миллион Швейцария франки (тахминан 3,327 миллион доллар)га сотилди, дея хабар бермоқда «ТАСС» Christie’s аукцион уйига таяниб.

Бунда гап Breguet маркасидаги 217-рақамли чўнтак соати ҳақида бормоқда. Дастлаб Шарль-Луи Гавас томонидан 1817 йилда харид қилинган соат Швейцариядаги хусусий музейдан жой олади.

Соатга вақтни бараварлаштириш механизми ўрнатилган бўлиб, у ўртача маҳаллий вақт ва реал қуёш вақти ўртасидаги фарқни кўрсатиш имконини беради.

Шарль-Луи Гавас (1783—1858 йиллар), франциялик банкчи, таржимон ва журналист, 1832 йилда «Гавас таржималари бюроси»ни очган, у хорижий матбуот обзорларини тайёрлаш билан шуғулланган. Бюро 1835 йилда «Гавас» агентлигига айлантирилган, кейинроқ Европада кенг мухбирлар тармоғи яратилган. 1944 йилда эса унинг асосида AFP агентлиги очилган.