Долларнинг заифлашиши ҳамда АҚШда нефть қазиб олишнинг пасайиши муносабати билан жаҳон миқёсида қора олтин нархи ўсишда давом этмоқда. Шу билан бирга, Яқин Шарқ мамлакатларида қазиб олинадиган нефть ҳажмининг кўпайиши истиқболлари нархнинг ўсиш суръатларини бироз пасайтирмоқда, деб ёзади «РИА Новости».
29 апрель куни Brent русумли Шимолий денгиз нефть аралашмасининг июль фьючерслари нархи 0,54 фоизга ошиб, баррелига 48,02 долларни ташкил қилди. Бундан олдинроқ Brent 2015 йил 9 ноябридан буён биринчи марта 48 доллардан юқорига кўтарилди — баррелига 48,08 доллар. WTI нефтининг июнь фьючерслари нархи 0,96 фоизга ўсиб, баррелига 46,47 долларни ташкил қилди.
Кўрсатилган даврда АҚШнинг асосий савдо шериклари бўлмиш олти мамлакат валюта корзинасида долларнинг индекси 0,41 фоизга тушиб, 93,38 пунктга борди. Долларнинг заифлашуви бошқа валютага эга инвесторларга нефтни арзонроқ сотиб олиш имконини беради.
Бундан ташқари, АҚШ энергетика вазирлиги бир ҳафтада нефть қазиб олиш ҳажми суткасига 0,16 фоизга ёки 15 минг баррелга қисқариб, 8,938 миллион баррелни ташкил этганини маълум қилди. Бу 2014 йил октябридан буён кузатилган минимумдир.
«Бозор баланси яхшиланмоқда, тўпланиб қолаётган захира йилнинг иккинчи ярмида етишмовчиликка кўчишига ишонмоқдамиз», — деб изоҳ берди Jefferies банки эксперти.
Изоҳ (0)