Бадиий гимнастика бўйича Ўзбекистон терма жамоаси аъзоси Анастасия Сердюкова Бразилиянинг Рио-де-Жанейро шаҳрида XXXI ёзги Олимпиада ўйинларининг йўлланмалари ўйналаётган мусобақада муваффақиятли иштирок этиб, Рио–2016 ўйинларига лицензияни қўлга киритди. Бу ҳақда Ўзбекистон Миллий олимпия қўмитаси матбуот хизмати хабар бермоқда.
Дунёнинг кўплаб етакчи бадиий гимнастикачилари иштирокида ўтаётган ушбу нуфузли мусобақанинг шахсий ҳисобдаги баҳсларида Ўзбекистон шарафини ҳимоя қилган истеъдодли спортчи кучли бешликдан ўрин эгаллади ва тўрт йилликнинг энг йирик спорт мусобақасида қатнашиш ҳуқуқига эга бўлди.
Анастасия Сердюкова лента билан бажариладиган машқда 16,766 очко билан тўртинчи, ҳалқа билан бажариладиган машқда 16,983 очко билан бешинчи, тўп билан бажариладиган машқда 16,800 очко билан еттинчи ва ниҳоят булавада бажариладиган машқда 16,316 очко билан ўн бешинчи натижани қайд этди ва умумий 66,865 очко жамғарган ҳолда олтинчи ўринни эгаллади.
Мазкур жадвалда Анастасиядан юқори ўринларни эгаллаган беш спортчидан икки нафари аввалроқ Рио—2016 Олимпиадаси йўлланмаларини қўлга киритганлиги боис, ўзбекистонлик спортчи ўз-ўзидан икки поғона юқорига кўтарилди ва кучли бешликдан ўрин олган спортчилар қаторида Олимпиада ўйинларига йўлланма олди.
Бугун, 22 апрель куни ўтказиладиган гуруҳ баҳсларида ўзбекистонлик бадиий гимнастикачилар Луиза Ганиева, Зарина Курбанова, Марта Растабурова, Самира Амирова ва Валерия Давидова совринли ўринлар учун кураш олиб боради. Ушбу мусобақада кучли учликдан ўрин эгаллаган жамоалар Рио–2016 ўйинларининг лицензиясига эга бўлади.
Шундай қилиб, ўзбекситонлик спортчилар томонидан Рио–2016 ўйинларига қўлга киритилган йўлланмалар сони 67 тага етди. Шундан 25 таси паралимпиячиларга тегишли.
Маълумот ўрнида, Анастасия Сердюкова 2014 йили Инчхон шаҳри (Жанубий Корея)да бўлиб ўтган Осиё ўйинларида жамоавий баҳсларда олтин, шахсий ҳисобда эса бронза медали совриндори бўлган.
Изоҳ (0)