«Насаф» футбол клубига қарши Осиё Чемпионлар Лигаси гуруҳ босқичи 5-тур учрашувидан сўнг ўз фикрлари билан ўртоқлашган «Ал-Айн» бош мураббийи Златко Далич «Насаф»нинг тезкор голи режаларни бузиб юборганини тан олди. Бу ҳақда «Championat.asia» интернет-нашри хабар бермоқда.
Эслатиб ўтамиз, «Насаф» — «Ал-Айн» учрашуви 1:1 ҳисобидаги дуранг натижа билан якунига етди. «Насаф» ҳимоячиси Мақсуд Каримов урган гол ОЧЛнинг 2016 йилги мавсумидаги энг тезкор иккинчи гол бўлди.
«Ўйин биз учун жуда қийин кечди. ‘Насаф’нинг тезкор голи режаларимизни ўзгартириб юборди. Биринчи бўлимда 3:1 ҳисобида ғалаба қозонишимиз керак эди. Тезкор гол ўтказиб юборганимиз сабаб, ғалаба қозона олмадик», — деди «Ал-Айн» устози.
«Ҳар иккала жамоа кейинги босқичга чиқиш имкониятини сақлаб қолди. «Насаф» таркибида тезкор футболчилар етарли. Рақиб қарши ҳужумларда жуда хавфли ўйнайди. Бироқ, барчаси ўз қўлимизда — кейинги ўйиндаги ғалаба бизга кейинги босқич йўлланмасини тақдим этади», — дея қўшимча қилди «Ал-Айн» бош мураббийи Златко Далич.
«Д» гуруҳида сўнгги — 6-тур учрашувлари 3 май куни бўлиб ўтади. Шу куни «Насаф» БААда «Ал-Айн» меҳмони бўлади. «Насаф» ҳисобида ҳозирча 5, «Ал-Айн» ҳисобида 7 очко бор. Гуруҳда Қатарнинг «Ал-Жаиш» 10 очко билан пешқадамлик қилмоқда, сўнгги ўриндаги «Ал-Аҳли» (Саудия Арабистони) ҳисобида 3 очко бор.
Изоҳ (0)