Badiiy gimnastika bo‘yicha O‘zbekiston terma jamoasi a’zosi Anastasiya Serdyukova Braziliyaning Rio-de-Janeyro shahrida XXXI yozgi Olimpiada o‘yinlarining yo‘llanmalari o‘ynalayotgan musobaqada muvaffaqiyatli ishtirok etib, Rio–2016 o‘yinlariga litsenziyani qo‘lga kiritdi. Bu haqda O‘zbekiston Milliy olimpiya qo‘mitasi matbuot xizmati xabar bermoqda.
Dunyoning ko‘plab yetakchi badiiy gimnastikachilari ishtirokida o‘tayotgan ushbu nufuzli musobaqaning shaxsiy hisobdagi bahslarida O‘zbekiston sharafini himoya qilgan iste’dodli sportchi kuchli beshlikdan o‘rin egalladi va to‘rt yillikning eng yirik sport musobaqasida qatnashish huquqiga ega bo‘ldi.
Anastasiya Serdyukova lenta bilan bajariladigan mashqda 16,766 ochko bilan to‘rtinchi, halqa bilan bajariladigan mashqda 16,983 ochko bilan beshinchi, to‘p bilan bajariladigan mashqda 16,800 ochko bilan yettinchi va nihoyat bulavada bajariladigan mashqda 16,316 ochko bilan o‘n beshinchi natijani qayd etdi va umumiy 66,865 ochko jamg‘argan holda oltinchi o‘rinni egalladi.
Mazkur jadvalda Anastasiyadan yuqori o‘rinlarni egallagan besh sportchidan ikki nafari avvalroq Rio—2016 Olimpiadasi yo‘llanmalarini qo‘lga kiritganligi bois, o‘zbekistonlik sportchi o‘z-o‘zidan ikki pog‘ona yuqoriga ko‘tarildi va kuchli beshlikdan o‘rin olgan sportchilar qatorida Olimpiada o‘yinlariga yo‘llanma oldi.
Bugun, 22-aprel kuni o‘tkaziladigan guruh bahslarida o‘zbekistonlik badiiy gimnastikachilar Luiza Ganiyeva, Zarina Kurbanova, Marta Rastaburova, Samira Amirova va Valeriya Davidova sovrinli o‘rinlar uchun kurash olib boradi. Ushbu musobaqada kuchli uchlikdan o‘rin egallagan jamoalar Rio–2016 o‘yinlarining litsenziyasiga ega bo‘ladi.
Shunday qilib, o‘zbeksitonlik sportchilar tomonidan Rio–2016 o‘yinlariga qo‘lga kiritilgan yo‘llanmalar soni 67 taga yetdi. Shundan 25 tasi paralimpiyachilarga tegishli.
Ma’lumot o‘rnida, Anastasiya Serdyukova 2014-yili Inchxon shahri (Janubiy Koreya)da bo‘lib o‘tgan Osiyo o‘yinlarida jamoaviy bahslarda oltin, shaxsiy hisobda esa bronza medali sovrindori bo‘lgan.
Izoh (0)