«Челси», «Интер» ва «Реал» клубларининг собиқ бош мураббийи Жозе Моуриньо ҳар йили БМТнинг болалар жамғармаси ЮНИСЕФ байроғи остида ўтказиладиган хайрия учрашувида жаҳон жамоасига қарши майдонга тушадиган Англия термасини ўз бошқарувига олади, деб хабар бермоқда «ТАСС».
Мазкур учрашув 2016 йилнинг 5 июнь куни, «Манчестер Юнайтед» жамоасига тегишли «Олд Траффорд» стадионида бўлиб ўтади. Моуриньо илгари ҳам бу каби хайрия учрашувида иштирок этган. 2014 йилда португалиялик мутахассис қўли остида майдонга тушган жаҳон жамоаси Англия термасини мағлубиятга учратган эди.
«Мен ушбу ўйинларнинг ҳар икки жамоасида ғалаба қозонган биринчи мураббий бўлмоқчиман», – деди 53 ёшли португалиялик мутахассис.
Жаҳон жамоасини Англиянинг «Лестер» клуби бош мураббийи Клаудио Раньери ўз бошқарувига олади.
Маълумот учун, 2015 йилнинг декабрь ойида «Челси» бош мураббийлигидан истеъфога чиқарилган Моуриньо, жорий мавсум якунида «Манчестер Юнайтед» клубини ўз бошқарувига олиши кутилмоқда.
Изоҳ (0)