Саудия Арабистонининг “Ан-Насср” ҳамда Португалия терма жамоаси ҳужумчиси Криштиану Роналду янги мавсумда кўплаб ўйинларни ўтказиб юбориши мумкин. Бу ҳақда саудиялик журналист Фалоҳ Ал-Қаҳдоний ўзининг ижтимоий тармоқ саҳифасида хабар берди.
Манбага кўра, 40 ёшли футболчи “Ан-Насср” бош мураббийи Хорхе Жезуш билан суҳбат ўтказган. Учрашув давомида улар Роналду саломатлигини асраш мақсадида кам аҳамиятга эга ўйинларда уни майдонга туширмасликка келишиб олишган.
Ёшини инобатга олган ҳолда, футболчи ва мураббий унинг юкламаларини эҳтиёткорлик билан назорат қилиш зарурлигини таъкидлаганлар. Ўтган мавсумда Роналду бир неча ўйинларни чарчоқ ва мушак зўриқиши сабабли ўтказиб юборган эди. Янги мавсумда шунга ўхшаш ҳолатларнинг олдини олиш мақсадида Криштиану жамоанинг камида 25 фоиз ўйинларида қатнашмасликка рози бўлган. Бу қарор айниқса 2026 йилги Жаҳон чемпионатига оптимал ҳолатда боришга ёрдам беради.
Маълумот учун, Саудия Пролигаси 2025/26 йилги мавсумига 21 август куни старт берилади.
Изоҳ (0)