“Chelsi”, “Inter” va “Real” klublarining sobiq bosh murabbiyi Joze Mourinyo har yili BMTning bolalar jamg‘armasi YuNISEF bayrog‘i ostida o‘tkaziladigan xayriya uchrashuvida jahon jamoasiga qarshi maydonga tushadigan Angliya termasini o‘z boshqaruviga oladi, deb xabar bermoqda “TASS”.
Mazkur uchrashuv 2016-yilning 5-iyun kuni, “Manchester Yunayted” jamoasiga tegishli “Old Trafford” stadionida bo‘lib o‘tadi. Mourinyo ilgari ham bu kabi xayriya uchrashuvida ishtirok etgan. 2014-yilda portugaliyalik mutaxassis qo‘li ostida maydonga tushgan jahon jamoasi Angliya termasini mag‘lubiyatga uchratgan edi.
“Men ushbu o‘yinlarning har ikki jamoasida g‘alaba qozongan birinchi murabbiy bo‘lmoqchiman”, – dedi 53 yoshli portugaliyalik mutaxassis.
Jahon jamoasini Angliyaning “Lester” klubi bosh murabbiyi Klaudio Ranyeri o‘z boshqaruviga oladi.
Ma’lumot uchun, 2015-yilning dekabr oyida “Chelsi” bosh murabbiyligidan iste’foga chiqarilgan Mourinyo, joriy mavsum yakunida “Manchester Yunayted” klubini o‘z boshqaruviga olishi kutilmoqda.
Izoh (0)