Қаршининг «Насаф» футбол клуби ярим ҳимоячиси Артур Геворкян Осиё Чемпионлар Лигаси гуруҳ босқичи 5-тури доирасида БААнинг «Ал-Айн» жамоасига қарши учрашувдан сўнг ЎзМТРКнинг «Спорт» телеканалига қисқа интервью берди.
Эслатиб ўтамиз, «Насаф» — «Ал-Айн» учрашуви 1:1 ҳисобидаги дуранг натижа билан якунига етди. «Насаф» ҳимоячиси Мақсуд Каримов урган гол ОЧЛнинг 2016 йилги мавсумидаги энг тезкор иккинчи гол бўлди.
«Ҳар уч-тўрт кунда ўйин ўтказишимизга тўғри келяпти. Шу сабабли жисмоний жиҳатдан қийин бўляпти. Захирадан тушганлар ўйинга янги ҳаво олиб киришга уриняпти, бироқ юкнинг катта қисми барибир асосий таркибга тушмоқда», — деди Геворкян.
«‘Ал-Айнъга қарши ўйинда жуда эрта гол урдик, яна гол урсак бўларди. Айниқса, иккинчи тайм охирида вазиятлар бўлди. Агар яратилган имкониятларнинг ярмидан фойдалана олганимизда ҳам, бугун ғалаба қозонган бўлардик», —деди «Насаф» етакчиси.
«Бизда ҳали ҳам имконият бор. ‘Ал-Айнъга қарши жавоб ўйинига фақат ғалаба мақсади билан борамиз», — деди «Насаф» сардори Артур Геворкян.
«Д» гуруҳида сўнгги — 6-тур учрашувлари 3 май куни бўлиб ўтади. Шу куни «Насаф» БААда «Ал-Айн» меҳмони бўлади. «Насаф» ҳисобида ҳозирча 5, «Ал-Айн» ҳисобида 7 очко бор. Гуруҳда Қатарнинг «Ал-Жаиш» 10 очко билан пешқадамлик қилмоқда, сўнгги ўриндаги «Ал-Аҳли» (Саудия Арабистони) ҳисобида 3 очко бор.
Изоҳ (0)