Йирик савдо марказларида режиссёр Санжар Шодиевнинг «Сени ўзим бой қиламан» номли фильми рекламаси, трейлери намойиши бир муддат бўлса-да тўхтаётгани йўқ, бироқ премьераси жуда чўзилди. Фильм ва унинг тақдимоти санаси ҳақида батафсил ахборот олиш мақсадида журналист Феруз Муҳаммад режиссёр Санжар Шодиев билан суҳбатлашди.
— Янги фильмингиз нима ҳақида?— Фильм шоу-бизнес ҳақида. Унда Жавоҳир Зокиров, Зарина Низомитдинова, Адиз Ражабов, Абдували Ражабов, Достон Убайдуллаев, Равшан Собиров, Шоҳида Исмоилова, Шароф Муқимов, Алишер Отабоев, хуллас, 40 га яқин машҳурлар рол ижро этган. Хусусан, фильмда ўзим ҳам суратга тушганман.
— Фильм рекламаси анча аввал бошланган эди, бироқ премьерадан ҳамон дарак йўқ. Ёки «Ўзбеккино» Бадиий кенгаши рухсат бермаяптими?— Ҳақиқатан ҳам, премьера кунининг маълум бўлиши чўзилиб кетди. Аммо бунга сабаб «Ўзбеккино» эмас. Фильмни кўрганингиздан кейин сабаби маълум бўлади. Айтишим мумкин бўлгани, фильм турли вилоятларда суратга олинди, ҳаммаси табиий бўлиши учун фасллар алмашинувини кутишимизга тўғри келди. Премьерани декабрда ўтказмоқчи эдим. Мана, бугун мендан бахтли одам йўқ, чунки премьера куни аниқ бўлди — 25 апрель. Премьерани жуда дабдабали қилиб ўтказмоқчиман — актёрлар жамоаси шунга муносиб.
— Баъзи фильмларнинг премьерасига ҳам чипта сотилмоқда. «Сени ўзим бой қиламан»нинг премьерасига ҳам билетлар сотиладими?— Йўқ. Чунки 40 га яқин актёрнинг мухлислари, ёру дўстлари бор, уларга қандай қилиб: «Бу чиптанинг нархи фалон сўм», деб бўлади?! Бундан ташқари, ўзимизнинг мухлисларимиз ҳам декабрдан бери таклифнома кутмоқда.
— Бу фильм кулдирадими ёки йиғлатади?— Ҳам йиғлатиб, ҳам кулдиради.
— Фильм номи жуда қизиқ. Фильмда ким кимни бой қилишга чоғланган?— Фильмнинг ишчи номи «Сени ўзим бой қиламан ёхуд танҳо юлдуз» эди. Тасвирга олиш ишлари якунига етганидан сўнг, «Сени ўзим бой қиламан» номига тўхталдик. Хуллас, кимда ким бой бўлмоқчи бўлса, фильмни томоша қилгани келсин. Ким кимни бой қилмоқчи бўлаётганини эса ҳозирча айта олмайман.
— «Биз севги йўлидамиз», «Кутилмаганда» фильмларида бош ролда ўйнаган бўлсангиз-да, премьерага келмаган эдингиз. Бу ёш режиссёрларни менсимасликми ёки ўша ролларингиздан кўнглингиз тўлмаганмиди?— Иккала тахминингиз ҳам нотўғри. Биласиз, бирор мухлис бир йил аввалдан тўйини белгилаб, олдиндан огоҳлантириб кетади. Премьера куни эса кўпи билан 15 кун аввал маълум бўлади. Иккала фильм премьераси вақтида бошқа вилоятда тўй маросимида эдим. Тўғриси, мен премьераларни, айниқса, мухлислар билан дийдорлашишни жуда яхши кўраман.
Изоҳ (0)