Ўзбек миллий академик драма театри актёри Ҳамид Тошпўлатов бир амплуага тушиб қолгани ҳақидаги фикрларни рад этиб, хонанда Ҳожиакбар Ҳайдаровнинг «Дўлана» клипида пул учун суратга тушмаганини маълум қилди. Бу ҳақда актёр «Суғдиёна» газетасига берган интервьюсида айтиб ўтди.
— Аксарият актёр-актрисалар бир амплуага тушиб қолади. Сизни ҳам кўпинча қаттиққўл ота, жаҳлдор қайнота ёки амалдор образида кўрамиз.— Фақат сержаҳл оталарни ўйнаётганим йўқ. Юмшоқ феълли қаҳрамонларим ҳам бор. Комедик образларни ҳам гавдалантираман. Актёрман ахир, ҳар қандай ҳолатга кира олишим керак.
— Кино ёки сериалларни тушунамиз, аммо клипларда-чи?— Яширмайман, бу масаланинг моддий томонлари бор. Қолаверса, таниш-билишлар илтимосини ерда қолдиролмайсиз-да. Ижро қилиб берасиз.
— Рад этсангиз, нима бўлади?— Шундоқ ҳам кўп таклифларни рад этаяпман. Клипларга чақиришади, аммо ҳаммасига ҳам боравермайман. Лекин шуни ҳам ҳамма ҳар хил тушунади. Муҳими, клипдаги образим бачкана бўлиб қолмасин. Мен шундан қўрқаман.
— Ҳожиакбар Ҳайдаровнинг «Дўлана» клипидаги ижронгиз-чи, Сизнингча, бачкана эмасми?— Шу клипда қатнашишим учун бир неча таниш-билишлар ўртага тушди. Нуриддин Ҳайдаров дўстим эди. Ўғлига йўқ дея олмадим. Теша Мўминов, Эркин Комилов билан бирга бордик, аммо клип сужетидан хабаримиз йўқ эди. Билганимиздан кейин эса ортга қайта олмасдик, отасининг ҳурмати. Бор гап шу. Ҳеч қандай пул-мул деган гап бўлмаган. «Дўлана»даги ролим кимгадир ёқмаган бўлса, ўзимни оқламайман. Лекин қоралашга ҳам ҳақим йўқ.
Изоҳ (0)