Yirik savdo markazlarida rejissor Sanjar Shodiyevning “Seni o‘zim boy qilaman” nomli filmi reklamasi, treyleri namoyishi bir muddat bo‘lsa-da to‘xtayotgani yo‘q, biroq premyerasi juda cho‘zildi. Film va uning taqdimoti sanasi haqida batafsil axborot olish maqsadida jurnalist Feruz Muhammad rejissor Sanjar Shodiyev bilan suhbatlashdi.
— Yangi filmingiz nima haqida?— Film shou-biznes haqida. Unda Javohir Zokirov, Zarina Nizomitdinova, Adiz Rajabov, Abduvali Rajabov, Doston Ubaydullayev, Ravshan Sobirov, Shohida Ismoilova, Sharof Muqimov, Alisher Otaboyev, xullas, 40 ga yaqin mashhurlar rol ijro etgan. Xususan, filmda o‘zim ham suratga tushganman.
— Film reklamasi ancha avval boshlangan edi, biroq premyeradan hamon darak yo‘q. Yoki “O‘zbekkino” Badiiy kengashi ruxsat bermayaptimi?— Haqiqatan ham, premyera kunining ma’lum bo‘lishi cho‘zilib ketdi. Ammo bunga sabab “O‘zbekkino” emas. Filmni ko‘rganingizdan keyin sababi ma’lum bo‘ladi. Aytishim mumkin bo‘lgani, film turli viloyatlarda suratga olindi, hammasi tabiiy bo‘lishi uchun fasllar almashinuvini kutishimizga to‘g‘ri keldi. Premyerani dekabrda o‘tkazmoqchi edim. Mana, bugun mendan baxtli odam yo‘q, chunki premyera kuni aniq bo‘ldi — 25-aprel. Premyerani juda dabdabali qilib o‘tkazmoqchiman — aktyorlar jamoasi shunga munosib.
— Ba’zi filmlarning premyerasiga ham chipta sotilmoqda. “Seni o‘zim boy qilaman”ning premyerasiga ham biletlar sotiladimi?— Yo‘q. Chunki 40 ga yaqin aktyorning muxlislari, yoru do‘stlari bor, ularga qanday qilib: “Bu chiptaning narxi falon so‘m”, deb bo‘ladi?! Bundan tashqari, o‘zimizning muxlislarimiz ham dekabrdan beri taklifnoma kutmoqda.
— Bu film kuldiradimi yoki yig‘latadi?— Ham yig‘latib, ham kuldiradi.
— Film nomi juda qiziq. Filmda kim kimni boy qilishga chog‘langan?— Filmning ishchi nomi “Seni o‘zim boy qilaman yoxud tanho yulduz” edi. Tasvirga olish ishlari yakuniga yetganidan so‘ng, “Seni o‘zim boy qilaman” nomiga to‘xtaldik. Xullas, kimda kim boy bo‘lmoqchi bo‘lsa, filmni tomosha qilgani kelsin. Kim kimni boy qilmoqchi bo‘layotganini esa hozircha ayta olmayman.
— “Biz sevgi yo‘lidamiz”, “Kutilmaganda” filmlarida bosh rolda o‘ynagan bo‘lsangiz-da, premyeraga kelmagan edingiz. Bu yosh rejissorlarni mensimaslikmi yoki o‘sha rollaringizdan ko‘nglingiz to‘lmaganmidi?— Ikkala taxminingiz ham noto‘g‘ri. Bilasiz, biror muxlis bir yil avvaldan to‘yini belgilab, oldindan ogohlantirib ketadi. Premyera kuni esa ko‘pi bilan 15 kun avval ma’lum bo‘ladi. Ikkala film premyerasi vaqtida boshqa viloyatda to‘y marosimida edim. To‘g‘risi, men premyeralarni, ayniqsa, muxlislar bilan diydorlashishni juda yaxshi ko‘raman.
Izoh (0)