Facebook’даги «Водители Ташкента (Drivers.uz)» гуруҳи аъзоси Тошкент Кичик ҳалқа йўлининг Амир Темур кўчаси устидан ўтган қисмида 4 апрель куни юз берган ҳолат видеоёзувини эълон қилди.
Видеода давлат рақам белгиси 01 V 368 WА бўлган Nexia автомобили қатнов қисми 3-ҳаракатланиш бўлаги бўйлаб кетаётган машина (комментларга кўра — BMW)нинг йўлини тўсишга уринаётгани тасвирланган. Видео BMW’нинг видеорегистратори ёрдамида олинган.
Ўнг томондан қувиб ўтган «йўлтўсар» Nexia’нинг ҳайдовчиси, йўл бермасликка ҳаракат қилишидан аввал, ҳаракат вақтида бошини машинадан чиқариб, BMW ҳайдовчисига нимадир деган. Шундан сўнг тезликни пасайтириб, BMW’нинг йўлини тўсган. BMW йўлбермас Nexia’ни ўнг томондан қувиб ўтишга уринганида, Nexia унга йўл бермаган, BMW энди чапга ҳаракатланмоқчи бўлганида, Nexia унга яна қаршилик кўрсатган.
Видео эълон қилинганидан сўнг бир гуруҳ фойдаланувчилар Nexia ҳайдовчиси нима учун бунчалик жаҳлда эканлигини, бунгача нима бўлганини сўраган. Видеони юклаган фойдаланувчининг ёзишича, BMW рулида чет эллик меҳмон бўлган, улар светофорнинг яшил чироғи ёниб, олдиндаги машина юришини кутаётганида Nexia ортдан сигнал чалиб қолган.
Facebook’даги муҳокамалар давом этаётган бир вақтда, фойдаланувчилардан бири Nexia ҳайдовчисини тасодифан топиб, у билан суҳбатлашганини айтган. Nexia ҳайдовчисининг сўзларига кўра, BMW ҳайдовчиси уни «сиқиб ўтиб кетган». Шундан сўнг Nexia ҳайдовчиси BMW’ни тўхтатиб, унинг ҳайдовчиси билан гаплашиб олмоқчи бўлган, бироқ BMW тўхтамаган.
Маълумот учун, Маъмурий жавобгарлик тўғрисидаги кодекснинг 128-5-моддаси 2-қисмига мувофиқ, транспорт воситалари ҳайдовчиларининг авария ҳолати юзага келишига сабаб бўлган, яъни, йўл ҳаракатининг бошқа қатнашчиларини тезликни, ҳаракат йўналишини кескин ўзгартиришга ёки ўз хавфсизлигини ёхуд бошқа фуқароларнинг хавфсизлигини таъминлаш учун ўзга чораларни кўришга мажбур қилувчи ҳуқуқбузарликни содир этиши энг кам ойлик иш ҳақининг 10 баравари (8 апрель ҳолатига кўра — 1 302 400 сўм) миқдорида жарима солинишига сабаб бўлади.
Изоҳ (0)