Facebook’даги «Водители Ташкента (Drivers.uz)» гуруҳи аъзоси Тошкент шаҳрининг Қорақамиш даҳасида 7 апрель куни юз берган эътиборга молик ҳолатнинг видеосини эълон қилди. Видеоёзув Matiz’нинг ҳаракатларидан жабрланган ҳайдовчининг автомобилидаги видеорегистратор ёрдамида олинган.
Видеонинг бошида светофорнинг яшил чироғидан сўнг жабрланувчи машинасини ўз йўналиши бўйлаб ўнгга, қарама-қарши қатнов қисмидан келаётган, давлат рақам белгиси 10 N 713 CA бўлган, орқа ойнасига «Ў» ва «Диққат, газ» огоҳлантирувчи белгилари ёпиштирилган Matiz автомобили эса чапга бурилиб, жабрланувчи ҳайдовчининг йўлини тўсгани ва бекатдан йўловчи чиқараётганини кўриш мумкин.
Matiz ҳайдовчиси харидор билан келишиб, уни автомобилига ўтказгунича, жабрланувчи автомобиль эгаси кутиб турган. Matiz шундан кейин ҳам юрмай, жабрланувчининг ҳаракатига халал беришга уринган. Жабрланувчи Matiz’ни ўнгдан айланиб ўтишга ҳаракат қилганида, Matiz унинг йўлини кесиб, ичида икки йўловчи борлигига қарамай, кескин ҳаракатларни амалга оширган.
Видео муаллифининг қўшимча қилишича, у кейинги светофорда Matiz’га етиб олган ва машинасидан тушиб, ҳайдовчи билан гаплашган. «У худди ҳеч нарса бўлмагандек ўзини жинниликка солди. Кейин, дарҳол жойидан қўзғалиб: ‘Қандай хоҳласам, шундай ҳайдайман’, деб кетди», — деб ёзади видео муаллифи.
Видеохабар остида фикр билдирган фойдаланувчилар Matiz ҳайдовчисининг ҳаракатларини кескин танқид остига олган, айни вақтда, видео муаллифининг сабр-тоқатига қойил қолган. «Сабрингиз темирбетондан экан», — деб таъриф берган гуруҳ аъзоларидан бири. Видеохабарга беш соат ичида 400 га яқин коммент қолдирди.
Изоҳ (0)