Австралия мамлакатга кўчиб келган миллионерлар сони бўйича дунёда етакчига айланди

Австралия ўтган йили мамлакатга кўчиб келган долларли миллионерлар сони бўйича дунёда етакчига айланди. Бу ҳақда New World Wealth консалтинг компанияси тадқиқотлари натижаларига таяниб, «Интерфакс» хабар бермоқда.

Австралияга келган бадавлат кишилар сони тахминан саккиз минг нафарни ташкил этди, натижада уларнинг умумий сони 290 мингга етди.

Рейтингда кейинги ўринларни АҚШ (7 минг миллионер келган, умумий миқдори 4,18 миллионга етган), Канада (5 минг миллионер келган, умумий сони 292 минг), Исроил (4 минг миллионер, умумий сони 71,7 минг), БАА (3 минг миллионер келган, умумий сони 72,1 минг) ва Янги Зеландия (2 минг миллионер келган, умумий сони 89 минг) эгаллади.

Аксинча, мамлакатни тарк этган миллионерлар сони бўйича Франция етакчилик қилди, ўтган йили у ердан ўн минг нафар миллионер кўчиб кетган, натижада уларнинг сони 323 мингга тушиб қолган. Ундан кейинги поғоналарда Хитой (9 минг киши кетган, 654 минг қолган), Италия (6 минг, 305 минг), Ҳиндистон (4 минг, 236 минг), Греция (3 минг, 55 минг), Россия (2 минг, 127 минг) жойлашди.