Барак Обама Россия ва АҚШ томонидан ядро қуролларини қисқартириш жараёнини давом эттиришга чақирди. 30 март, чоршанба куни кечки пайт Washington Post газетасининг электрон кўринишида чоп этилган муаллифлик мақоласида давлат раҳбари стратегик ядро аслаҳалари ҳажмини камайтириш бўйича музокараларни олиб бориш, дунёда ядро қуролини тўлиқ йўқ қилишга интилиш зарурлигини билдирган. Бу ҳақда «ТАСС» хабар бермоқда.
АҚШ президентининг айтишича, «Россия ва АҚШ 2011 йил 5 февралда кучга кирган стратегик ҳужум қуролларини қисқартириш ва чеклаш бўйича чоралар ҳақидаги шартнома доирасидаги мажбуриятларини бажаришни ўз олдига мақсад қилиб қўйган. Томонлар мазкур шартнома талабларини бажарган тақдирда, 2018 йилга келиб АҚШ ва Россиянинг шай ҳолатдаги ядро каллаклари сони 1950 йилдан бери энг паст кўрсаткичга етади».
«Американинг совуқ уруш давридан қолган улкан ядро арсенали бугунги хавфларни бартараф этиш учун тўғри келмаслиги»ни тан олган Обама дунёдаги ядро аслаҳаларининг 90 фоизига эга бўлган АҚШ ва Россия мазкур қуролларни камайтириш юзасидан музокараларни давом эттириши зарурлигини таъкидлаган.
Эслатиб ўтамиз, Вашингтонда 31 март, пайшанба куни ядро хавфсизлиги масалаларига бағишланган халқаро саммит ўз ишини бошлайди, бироқ Россия мазкур анжуманда иштирок этишдан бош тортган.
Изоҳ (0)