Barak Obama Rossiya va AQSh tomonidan yadro qurollarini qisqartirish jarayonini davom ettirishga chaqirdi. 30-mart, chorshanba kuni kechki payt Washington Post gazetasining elektron ko‘rinishida chop etilgan mualliflik maqolasida davlat rahbari strategik yadro aslahalari hajmini kamaytirish bo‘yicha muzokaralarni olib borish, dunyoda yadro qurolini to‘liq yo‘q qilishga intilish zarurligini bildirgan. Bu haqda “TASS” xabar bermoqda.
AQSh prezidentining aytishicha, “Rossiya va AQSh 2011-yil 5 fevralda kuchga kirgan strategik hujum qurollarini qisqartirish va cheklash bo‘yicha choralar haqidagi shartnoma doirasidagi majburiyatlarini bajarishni o‘z oldiga maqsad qilib qo‘ygan. Tomonlar mazkur shartnoma talablarini bajargan taqdirda, 2018-yilga kelib AQSh va Rossiyaning shay holatdagi yadro kallaklari soni 1950-yildan beri eng past ko‘rsatkichga yetadi”.
“Amerikaning sovuq urush davridan qolgan ulkan yadro arsenali bugungi xavflarni bartaraf etish uchun to‘g‘ri kelmasligi”ni tan olgan Obama dunyodagi yadro aslahalarining 90 foiziga ega bo‘lgan AQSh va Rossiya mazkur qurollarni kamaytirish yuzasidan muzokaralarni davom ettirishi zarurligini ta’kidlagan.
Eslatib o‘tamiz, Vashingtonda 31-mart, payshanba kuni yadro xavfsizligi masalalariga bag‘ishlangan xalqaro sammit o‘z ishini boshlaydi, biroq Rossiya mazkur anjumanda ishtirok etishdan bosh tortgan.
Izoh (0)