Вашингтоннинг севимли воситасига айланган иқтисодий санкциялар худди ҳарбий куч каби эҳтиёткорлик билан қўлланилиши керак, деди АҚШ молия вазири Жек Лью PBS’га берган интервьюсида. «Биз бу ўсишнинг секинлашувига олиб келиши туфайлигина, санкцияларни қўллашдан бош торта олмаймиз, бироқ биз уларга енгилтаклик билан муносабатда бўла олмаймиз», — дея унинг сўзларини келтирди «Ведомости».
Америка молия вазирлиги раҳбари Вашингтон санкцияларни жиддий восита деб ҳисоблашини, улардан зарур пайтда фойдаланиш учун, уларнинг самарадорлигини келажакда ҳам сақлаб қолиш кераклигини таъкидлади. Вақт ўтиши билан ушбу таъсир воситаси умумий эмбаргодан (Кубага нисбатан жорий қилинган санкциялар каби) маълум бир секторга қаратилган санкциялар (Россияга нисбатан қўлланилган санкциялар каби) кўринишига ўтди.
«Санкциялар ўзлари қўлланилган ҳукумат сиёсати билан мувофиқ тушиши керак, — дея таъкидлади вазир. — Агар ‘сиёсатни ўзгартиринг, шунда биз санкцияларни бекор қиламиз’ деган тамойил эълон қилинган бўлса, шундай бўлиши керак. Бундай мукофотга ўз ядро дастурини чеклашга рози бўлган Эронга нисбатан санкцияларнинг бекор қилинишини мисол келтириш мумкин».
Изоҳ (0)