Саккиз йил аввал Bear Sterns инвестиция банкининг синишини келтириб чиқарган молиячининг исм-шарифи ошкор бўлди, жаҳон молиявий инқирози шу воқеадан бошланган эди, деб ёзади «РБК».
У Hayman Capital Management жамғармаси асосчиси Кайл Бэсс бўлиб чиқди, унинг исм-шарифи Молиявий инқирозни текшириш бўйича комиссиянинг илк маротаба ошкор қилинган ҳужжатларида бўлган, улар билан Американинг The Wall Street Journal нашри танишиб чиқди.
Бэсс CNBC бошловчиси Дэвид Фабернинг манбаси бўлган, у (бошловчи) 2008 йил 12 март куни телеканал эфирида Bear Sterns раҳбари Алан Шварцдан АҚШнинг энг йирик инвестбанки Goldman Sachs унинг муассасаси билан хавфлар юқори бўлгани туфайли иш олиб боришни тўхтатгани рост ёки ёлғон эканлиги ҳақида сўради.
Шварц ушбу миш-мишларни рад этди, бироқ инвесторлар кредит ташкилотига бўлган ишончини йўқотди, чунки унинг мураккаб молиявий вазияти ҳақидаги гап-сўзлар аввалданоқ мавжуд бўлган эди. 12 март куни кечки пайтга келиб, банк деярли тўлиқ ликвидлилигини йўқотди.
Икки кундан сўнг АҚШ Федерал захира тизими воситачилигида Bear Sterns’нинг JP Morgan банки томонидан ўзлаштирилиши ҳақидаги битимга эришилди. Bear Sterns акцияларининг назорат пакети банк синишидан бир ҳафта аввал биржаларда қайд этилган ўз бозор қийматидан бир неча ўн баробар паст нархда сотиб олинди.
Яқин вақтларгача CNBC журналистлари банкнинг банкрот бўлишига олиб келган ахборот манбасини сир тутиб келган эди. Охир-оқибат, маълумот тасдиқланди: Фабернинг дастури эфирга чиқишидан бир кун аввал Goldman Sachs ҳақиқатан ҳам Bear Sterns билан савдо қилишдан бош тортган.
Bear Sterns АҚШда 2008 йилги молиявий инқироз чоғида банкротлик ёқасида қолган биринчи йирик молиявий ташкилотга айланди. Оқибатда ушбу вазият яна бир нечта банклар, жумладан, Lehman Brothers билан ҳам такрорланди, унинг синиши Америка молия тизими тарихидаги энг йириги бўлди.
Изоҳ (0)