FlyDubai авиакомпаниясининг Ростов-Донда қулаган Boeing 737 самолёти, дастлабки маълумотларга кўра, техник жиҳатдан соз бўлган. Бу ҳақда Давлатлараро авиация қўмитаси (ДАҚ) маълум қилган, дея хабар беради «Ведомости».
«‘Қора қути’лардаги маълумотларнинг дастлабки таҳлили натижаларига кўра самолёт тизим ва агрегатлари, куч қурилмаларида ҳеч қандай нуқсонлар аниқланмади. Ҳаво кемаси амалдаги учишга яроқлилик сертификатига эга бўлган, зарур техник хизмат кўрсатишдан ўтган ва парвоз чоғи камчиликлардан холи бўлган», — дейилади ДАҚ хабарида.
Олдинроқ ОАВда «қора қути»лардаги музокаралар ёзувига таяниб, самолётни автопилотда қўндиришга бўлган икки уринишдан сўнг қўлда бошқариш тартибига ўтиш чоғида учувчилар кабинасида юзага келган можаро ҳақида маълум қилинганди. Экспертлар учувчилар Boeing 737 самолётининг қўниш тартибидан парвоз тартибига ўтиш хусусиятларини инобатга олмаганини билдирмоқда.
Изоҳ (0)