Россия президенти Владимир Путиннинг маълумот беришича, Суриядаги ҳарбий операцияга мамлакат мудофаа вазирлиги бюджетидан 33 миллиард рубль сарфланган. Бу ҳақда Meduza хабар бермоқда.
Операция якунлари ҳақида гапираркан, Путин Россия «вазиятни тубдан ўзгартиргани»ни таъкидлади.
«Биз террор ўсимтасининг илдиз отишига йўл қўймадик, жиноятчиларнинг захиралари, қурол ва ўқ-дори сақланадиган омборхоналари вайрон қилинди, террорчиларнинг асосий молиявий озуқаси бўлган нефть контрабандаси йўналишлари тўсилди», — деди у Суриядаги махсус операцияда намуна кўрсатган ҳарбийларга давлат мукофотларини топшириш маросимидаги чиқишида.
Шунингдек, Путин Суриядаги қонуний давлатчиликни мустаҳкамлаш йўлида катта ишлар амалга оширилганини алоҳида қайд қилиб ўтди. У Сурияга ҳар томонлама ёрдам кўрсатиш, шу жумладан, ҳарбий операцияларга Россия авиациясини жалб қилишга ваъда берди. РФ раҳбари, зарур бўлса, Суриядаги ҳарбий қўшилма бир неча соат ичида кучайтирилиши мумкинлигини айтиб ўтди.
Маросимда 17 ҳарбий хизматчига мукофотлар топширилди, жумладан, тўрт киши — Марказий ҳарбий округ қўшинлари қўмондонининг биринчи ўринбосари генерал-полковник Александр Дворников, Бош штаб бош бошқармаси зобити полковник Вадим Байкулов, катта синовчи штурман полковник Виктор Романов ва авиация эскадрильяси командири ўринбосари, майор Андрей Дьяченко Россия Қаҳрамони унвонига муносиб кўрилди.
Расмий маълумотларга кўра, АҚШ Сурия ва Ироқдаги авиазарбаларга ҳар куни 11,5 миллион доллар сарфлайди. Россиянинг Суриядаги 167 кунлик (2015 йил 30 сентябридан 2016 йил 15 мартигача) операциясининг бир кунлик харажати 2,8 миллион долларни ташкил қилди.
Изоҳ (0)