Ўзбекистоннинг тоғли ҳудудларида 2 март куни ёғингарчилик бўлиши мумкин

Ўзбекистонда 2 март, чоршанба куни ҳаво ўзгариб туради, мамлакатнинг тоғли ҳудудларида ёғингарчилик бўлиши мумкин. «Ўзгидромет» ахборотига кўра, Ўзбекистоннинг қолган ҳудудларида ёғингарчилик кутилмайди.

2 мартга ўтар кечаси ҳаво ҳарорати Ўзбекистоннинг тоғли ҳудудларида -3 даражагача, Қорақалпоғистон ва Хоразм вилоятида -2 даражагача совиши кутилмоқда.

Фарғона водийси вилоятларида ҳаво ҳарорати +8 даражагача, Тошкент, Самарқанд, Жиззах, Сирдарё вилоятлари ва Тошкент шаҳрида +10 даражагача, Бухоро ва Навоий вилоятларида +12 даражагача, Қашқадарё ва Сурхондарё вилоятларида эса +13 даражагача илиқ бўлади.

2 март куни кундузи Қорақалпоғистон Республикаси ва Хоразм вилоятида +13 даражагача, Ўзбекистоннинг тоғли ҳудудларида +15 даражагача, Фарғона водийси вилоятлари ва Тошкент шаҳрида +20 даражагача илиқ бўлади.

Чоршанба куни кундузи Бухоро, Навоий, Тошкент, Самарқанд, Жиззах, Сирдарё, Қашқадарё ва Сурхондарё вилоятларида ҳаво ҳарорати +18...+23 даража илиқ бўлиши кутилмоқда.

Аввалроқ, 29 февраль куни Тошкент, Самарқанд, Термиз ва Нукус шаҳарларида ҳаво ҳароратининг илиқлиги бўйича янги рекордлар ўрнатилгани ҳақида хабар берилган эди.