29 февраль, душанба куни Тошкент ва Самарқанд шаҳарларида +25,6 даражагача, Термизда +29,5 даражагача, Нукусда эса +15,4 даражагача кўтарилди. Бу ҳақда «Ўзгидромет» маркази хабар бермоқда.
Эътиборли томони, тўрт шаҳарда ҳам метеорологик кузатувларнинг 29 февраль тарихи бўйича янги рекордлар ўрнатилди. Хусусан, бунгача Тошкентдаги энг иссиқ 29 февраль 1948 йилда (+22,9 даража), Самарқанд ва Термизда 1968 йилда (мос равишда +19 ва +23,4 даража), Нукусда эса 2004 йилда (+12,2 даража) кузатилган.
Ўзбекистонда 2016 йилги январь—февраль ойлари нисбатан илиқ келди. Тошкент, Самарқанд, Термиз ва Нукус шаҳарларида бунгача ҳам бир неча ҳаво ҳароратининг илиқлиги бўйича янги рекордлар ўрнатилди.
Маълумот ўрнида, 2016 йил 29 февраль куни Ўзбекистоннинг бошқа шаҳарларида энг юқори ҳаво ҳарорати қуйидагича бўлган: Урганч — +19 даража; Андижон, Фарғона — +23 даража; Жиззах, Гулистон, Наманган — +24 даража; Навоий — +25 даража; Қарши — +27 даража.
Изоҳ (0)