Корея фан ва технология илғор институти (Korea Advanced Institute of Science and Technology, KAIST) делегацияси 29 февраль куни Тошкент шаҳридаги Инҳа университетига ташриф буюрди. Бу ҳақда университет матбуот хизмати хабар бермоқда.
Делегацияга KAIST’нинг молия факультети раҳбари Жан-ку Канг бошчилик қилди. Делегация таркибида KAIST бош маъмури Бокюнг Канг ва маъмур Жи-хе Кинглар ҳам бор эди.
Таъкидлаш керакки, KAIST Корея Республикасининг таълим ва тадқиқот бўйича етакчи ўқув юртларидан биридир. У 1971 йилда Корея ҳукумати томонидан биринчи миллий фан, тадқиқот ва техника институти сифатида ташкил этилган.
KAIST делегациясининг Тошкент шаҳридаги Инҳа университетига ташрифидан мақсад Жанубий Корея университетининг хориждаги илк филиали фаолияти билан танишишдир.
Тошкент шаҳридаги Инҳа университети ректори Шерзод Шерматов KAIST делегациясини қабул қилди. Учрашув давомида Корея делегацияси Тошкент шаҳридаги Инҳа университети тарихи ва фаолияти ҳақида маълумот олди. Тошкент шаҳридаги Инҳа университетида ўқув жараёни Корея Республикасидаги Инҳа университети замонавий ва халқаро таълим стандартлари асосида олиб борилади, деди ректор.
Учрашув вақтида Тошкент шаҳридаги Инҳа университети KAIST билан маҳаллий профессорлар малакасини ошириш ва мақсадли тайёрлашда ҳамкорлик қилишдан манфаатдор эканлигини қайд этди. Томонлар бошқа масалаларни ҳам муҳокама этди.
Учрашув сўнгида Жан-ку Канг университет ташрифлар китобига ўзининг илиқ тилак ва истакларини ёзиб қолдирди. Делегация вакиллари Тошкент шаҳридаги Инҳа университетида талабалар ва ўқитувчилар учун яратилган замонавий шарт-шароитлар билан ҳам танишди.
Изоҳ (0)