27 февраль, шанба куни кечки пайт Россиянинг Воркута шаҳридаги «Шимолий» («Северная») конида юз берган навбатдаги портлашдан сўнг у ерда қамалда қолган 26 кончининг тирик эканлигидан умид йўқ. Бу ҳақда Россия фавқулодда вазиятлар вазири Владимир Пучков маълум қилди. Кон эгаси бўлган «Воркутауголь» компанияси вакиллари ҳам буни тасдиқлаган, дея хабар беради «РБК».
Пучковнинг билдиришича, навбатдаги портлаш эпимаркази еростининг кончилар бўлган қисмига тўғри келган. «Коннинг фалокат рўй берган ҳудудидаги ҳолат кимдир омон қолишига имкон бермаслигини қайд этишга мажбурмиз. Кетма-кет портлашлар туфайли у ерда юқори ҳарорат мавжуд, кислород эса йўқ», — дея таъкидлаган ФВВ раҳбари.
Эслатиб ўтамиз, 25 февраль куни «Шимолий» конида метан портлаши туфайли 4 киши ҳалок бўлган, 26 киши қамалда қолганди. Портлаш чоғида конда 111 киши бўлган, улардан 81 киши юқорига олиб чиқилган.
28 февралга ўтар кечаси конда қидирув-қутқарув ишлари вақтида яна бир портлаш содир бўлди. Натижада беш нафар қутқарувчи ва бир нафар кончи ҳалок бўлди.
Изоҳ (0)