Москвада Борис Немцов хотирасига бағишланган маршда 24,2 минг киши иштирок этди. Бу ҳақда тадбир қатнашчилари ҳисоб-китоби билан шуғулланган «Оқ ҳисоблагич» («Белий счётчик») ташкилоти вакиллари маълум қилган, дея хабар беради Meduza.
Полиция вакилларининг таъкидлашича, тадбир чоғида фавқулодда ҳолатлар рўй бермаган, иштирокчилар сони эса 7,5 минг кишини ташкил этган.
2015 йилнинг 27 февралида ўлдирилган сиёсатчи Борис Немцов хотирасига бағишлаб Россиянинг турли шаҳарларида хотира акциялари ўтказилди. Москвадаги марш иштирокчилари расмийлар билан 50 минг кишигача бўлган акцияни келишганди.
Олдинроқ Интерпол бош котибияти сиёсатчининг қотиллигини ташкил қилганликда гумонланаётган Руслан Муҳиддиновни қидирувга бергани хабар қилинганди.
Изоҳ (0)