Ҳиндистоннинг Махараштра штати, Тхане шаҳрида 28 февраль, якшанбага ўтар кечаси 35 ёшли Хансил Варекар оиласининг 14 нафар аъзоси, жумладан, саккиз нафар болани ўлдирди ва жонига қасд қилди. Бу ҳақда The Indian Express нашрига таяниб, «РБК» хабар берди.
Фожиа арафасида оилада меҳмондорчилик ўтказилган ва қариндошларнинг аксар қисми тунаш учун уйда қолганди.
«Қотил уй эшиклари, чиқиш жойларини маҳкамлаб ташлаганини тахмин қилиш мумкин. Шундан сўнг ухлаб ётган оиласининг барча аъзоларини жасади ёнидан топилган пичоқ билан сўйиб ташлаган. Кейин ўзини осиб ўлдирган», — дея ҳикоя қилади маҳаллий полиция комиссари Ашутош Думбаре.
Ота-онаси, уч нафар синглиси, хотини ва саккиз нафар бола Варекарнинг қурбони бўлди. Оғир яраланган сингилларидан бири қичқириб, ёрдамга чақира бошлаган. Бу қичқириқларни қўшни уйда яшовчи оиланинг яна бир қариндоши эшитиб, эшикни очишга ҳаракат қилган. Бироқ эшик тамбалангани сабабли ичкарига киролмагач, дераза панжарасини бузиб, уйга кирган ва фожиага гувоҳ бўлган. Уйда бўлганлардан фақат бир аёл тирик қолган ва у шифохонага ётқизилган.
Мазкур жиноятга ундаган сабаблар ҳозирча маълум эмас, полиция текширув олиб бормоқда.
Олдинроқ АҚШнинг Вашингтон штатида эркак оиласининг тўрт нафар аъзосини отиб ўлдиргач, ўз жонига қасд қилгани хабар берилганди.
Изоҳ (0)