Ўзбекистоннинг Россиядаги янги элчиси Россия ташқи ишлар вазири ўринбосари билан ҳамкорлик истиқболларини муҳокама қилди

Россия Федерацияси Ташқи ишлар вазири ўринбосари Григорий Карасин Ўзбекистоннинг Россиядаги янги тайинланган элчиси Бахром Ашрафхановдан ишонч ёрлиқлари нусхасини қабул қилиб олди, дея хабар бермоқда Россия ТИВ.

Бўлиб ўтган суҳбат чоғида томонлар ҳамкорлик истиқболларини муҳокама қилди.

«Суҳбат давомида Россия-Ўзбекистон кун тартибидаги долзарб масалалар муҳокама этилди, Россия ва Ўзбекистоннинг икки томонлама ҳамкорликни стратегик шериклик ва иттифоқдошлик руҳида янада мустаҳкамлаш ва кенгайтиришга қаратилган ўзаро интилишлари тасдиқланди», — дейилади хабарда.

Эслатиб ўтамиз, аввалроқ Ўзбекистон Республикасининг Россия Федерациясидаги Фавқулодда ва Мухтор Элчиси этиб тайинланган Бахром Ашрафханов Тошкентдан Москвага жўнаб кетгани хабар берилган эди.