Давлат божхона қўмитасида Ўзбекистон Республикаси Олий Мажлиси Сенати ва Қонунчилик палатаси билан ҳамкорликда пойтахтда ва Тошкент вилоятида фаолият юритаётган 100 дан ортиқ ташқи иқтисодий фаолият иштирокчилари, кичик бизнес ва хусусий тадбиркорлик субъектлари, божхона расмийлаштируви бўйича мутахассислар иштирокида жорий йилнинг 20 январида тасдиқланган янги таҳрирдаги Божхона кодексига бағишланган семинар-тренинг ташкил этилди. Бу ҳақда қўмита матбуот хизмати хабар бермоқда.
Семинар-тренингда Давлат божхона қўмитасининг бир қатор мутасадди бошқармалари вакиллари томонидан мазкур Кодекснинг қабул қилинишига сабаб бўлган заруратлар, ўзига хос жиҳатлари ва афзалликлари, амалдаги Кодексдан фарқли жиҳатлари ҳақида кўргазмали воситалар кўмагида батафсил тушунтиришлар берилди.
Мазкур Кодекс концептуал жиҳатдан амалдаги Божхона кодексидан фарқ қилиб, ташқи савдони ривожлантириш ҳамда ташқи савдо операцияларини амалга оширишда божхона назорати самарадорлигини таъминлаш ва мамлакат ҳудудида товар айланмасини тартибга солишда муҳим аҳамият касб этади.
Шунингдек, божхона расмийлаштирувида субъектив омилларга йўл қўймаслик ҳамда расмийлаштирув жараёнлари муддатларини қисқартириш мақсадида, интерфаол хизматлардан унумли фойдаланиш ва ахборот-коммуникация технологиялари татбиқ этилишининг ҳуқуқий асослари шакллантирилган, божхона органлари томонидан интеллектуал мулкни ҳимоя қилишнинг аниқ меъёрлари, божхона экспертизасидан ўтказиш тартиби ҳам ўз ифодасини топган.
Тадбирда ташқи иқтисодий фаолият иштирокчилари ўзларини қизиқтирган барча саволларга мутахассислардан батафсил жавоблар олди. Бу каби семинар-тренинглар Қорақалпоғистон Республикаси ва вилоятларда ҳам ташкил этилмоқда.
Эслатиб ўтамиз, 12 та бўлим, 59 та боб ва 412 та моддадан ташкил топган янги таҳрирдаги Божхона кодекси 2016 йил 21 апрелда кучга киради. Айни шу санадан бошлаб нафақат амалдаги Божхона кодекси, балки Ўзбекистон Республикасининг «Бож тарифи тўғрисида»ги Қонуни ҳамда ушбу қонунларга киритилган ўзгартириш ва қўшимчалар ҳам ўз кучини йўқотади.
Изоҳ (0)