Болгария пойтахти София шаҳрида анъанавий тарзда ўтказилиб келинадиган «Странжа» халқаро турнири бошланди, деб хабар беради Ўзбекистон Миллий олимпия қўмитаси матбуот хизмати.
67-бор ташкил этилган мазкур халқаро турнирнинг бу йилги баҳсларида 40 давлатдан келган 300 нафардан зиёд эркак ва аёллар 13 комплект медаллар учун баҳс юритади.
Мусобақада Ўзбекистон шарафини Хуршид Тожибоев (-60 кг), Маҳмуд Ғоипов (-69 кг), Исроил Мадримов (-75 кг), Зухриддин Маҳкамов (-81 кг), Сардорбек Бегалиев (-91 кг), Мирзоҳид Абдуллаев (+91 кг), Ёдгорой Мирзаева (-51 кг), Маҳфузахон Эргашева (-60 кг) ва Нафисахон Асқарова (-75 кг) ҳимоя қилмоқда.
Мусобақанинг биринчи кунида бўлиб ўтган жангларда рингга кўтарилган тўрт нафар ўзбекистонлик спортчидан уч нафари ғалаба қозониб, совринли ўринлар учун курашни давом эттирадиган бўлди.
Жумладан, Хуршид Тожибоев қозоғистонлик Жакшилик Илясовни 3:0, Ёдгорой Мирзаева туркиялик Нериман Истикни 3:0, Нафисахон Асқарова эса италиялик Моника Флоридиани 2:0 ҳисобида мағлуб этди. Фақатгина Маҳфузахон Эргашева австралиялик рақибига имкониятни бой бериб қўйди.
«Странжа» халқаро турнирининг финал жанглари 27 февраль куни ўтказилади.
Изоҳ (0)