Bolgariya poytaxti Sofiya shahrida an’anaviy tarzda o‘tkazilib kelinadigan “Stranja” xalqaro turniri boshlandi, deb xabar beradi O‘zbekiston Milliy olimpiya qo‘mitasi matbuot xizmati.
67-bor tashkil etilgan mazkur xalqaro turnirning bu yilgi bahslarida 40 davlatdan kelgan 300 nafardan ziyod erkak va ayollar 13 komplekt medallar uchun bahs yuritadi.
Musobaqada O‘zbekiston sharafini Xurshid Tojiboyev (-60 kg), Mahmud G‘oipov (-69 kg), Isroil Madrimov (-75 kg), Zuxriddin Mahkamov (-81 kg), Sardorbek Begaliyev (-91 kg), Mirzohid Abdullayev (+91 kg), Yodgoroy Mirzayeva (-51 kg), Mahfuzaxon Ergasheva (-60 kg) va Nafisaxon Asqarova (-75 kg) himoya qilmoqda.
Musobaqaning birinchi kunida bo‘lib o‘tgan janglarda ringga ko‘tarilgan to‘rt nafar o‘zbekistonlik sportchidan uch nafari g‘alaba qozonib, sovrinli o‘rinlar uchun kurashni davom ettiradigan bo‘ldi.
Jumladan, Xurshid Tojiboyev qozog‘istonlik Jakshilik Ilyasovni 3:0, Yodgoroy Mirzayeva turkiyalik Neriman Istikni 3:0, Nafisaxon Asqarova esa italiyalik Monika Floridiani 2:0 hisobida mag‘lub etdi. Faqatgina Mahfuzaxon Ergasheva avstraliyalik raqibiga imkoniyatni boy berib qo‘ydi.
“Stranja” xalqaro turnirining final janglari 27-fevral kuni o‘tkaziladi.
Izoh (0)