«Барселона» жамоаси ҳужумчиси Неймар клуб раҳбарияти билан шартномасини узайтириш борасида келишувга эришди. Бу ҳақда COPE нашрига таянган ҳолда «ТАСС» агентлиги хабар бермоқда.
Манбанинг маълум қилишича, томонлар шартномани 2021 йилга қадар узайтиришга келишиб олди. Бўлажак шартномага кўра, бразилиялик футболчининг маоши оширилади. Бироқ, у қанча маош олиши ҳақида маълумотлар ҳозирча йўқ.
Аввалроқ 24 ёшли ҳужумчига «Реал» ҳамда «Манчестер Юнайтед» клублари қизиқиш билдирган. Испан нашрлари «Қироллик клуби» президенти Флорентино Перес «Барселона»га Неймар учун 190 миллион евро таклиф қилгани ва улар деярли келишувга эришгани ҳақида хабар қилганди.
Жорий мавсумда Неймар «Барселона» сафида 32 ўйинда майдонга тушиб, рақиблар дарвозасига 23 та гол киритган. Таъкидлаш жоиз, унинг каталонияликлар билан амалдаги шартномаси 2018 йилнинг ёзига қадар давом этади.
Изоҳ (0)