АҚШ Мудофаа вазирлиги Шимолий Корея ҳақиқатан ҳам Ер яқинидаги орбитага сунъий йўлдош ёки бошқа қурилмани учирганлигини тасдиқлади. Бу ҳақда ҳарбий бошқарма расмий вакили Питер Кукнинг маълумотига таяниб, Reuters агентлиги хабар беради.
У КХДРнинг ушбу ҳаракатини қоралади ва уни «провокацион» деб атади ҳамда дунёнинг бир қатор давлатларининг юз берган ҳодисага нисбатан салбий муносабатини эслатиб ўтди.
Шунингдек, Кук АҚШ Жанубий Корея билан унинг ҳудудида ракетага қарши мудофаанинг илғор тизимини кенгайтириш ҳақидаги расмий музокараларни бошлашини тасдиқлади. Бунда Пхеньян томонидан ошиб бораётган таҳдидга қарши туриш мақсади кўзланган. Сўз энг янги THAAD (Terminal High Altitude Area Defense System) комплекси ҳақида бормоқда.
Эслатиб ўтамиз, Шимолий Корея 7 февраль, якшанбага ўтар кечаси узоқ масофага парвоз қилувчи ракетани учирганлиги ҳақида маълум қилинган эди. Пхеньяннинг ўзи эса «Кванмёсон-4» сунъий йўлдоши бўлган ракета қурилмани орбитага олиб чиққанини маълум қилди.
Изоҳ (0)