Россиянинг Сургут шаҳрида автомобилларга ёқилғи қуйиш шохобчасида ўз автомобилига тасодифан ўт қўйиб юборган аёл маъмурий жаримага тортилди, деб хабар беради «ТАСС».
Текширувлар давомида пистолет бакда турган пайтда аёл бензин баки қулфини ёндиргич (зажигалка) билан иситишга урингани аниқланди. Шу сабабли аланга юзага келган. Унга 4 дан 5 минг рублгача бўлган маъмурий жарима белгиланган, аёл жаримани тўлаб бўлган.
ФВВнинг Югра округи бўйича бош бошқармаси матбуот хизмати хабар қилишича, бир қатор енгиллаштирувчи ҳолатлар борлиги учун аёл минимал жарима тўлаган. Биринчидан, у қилган ишидан пушаймон, иккинчидан, у илгари жавобгарликка тортилмаган.
Автомобилларга ёқилғи қуйиш шохобчасидан шикоят тушмагани учун жиноий иш очилмади. ФВВ маълумотига кўра, автомобилга арзимас зарар етган.
Сургутдаги ёқилғи қуйиш шохобчасидаги ҳодиса 2016 йил 4 январда содир бўлганди. Аёлнинг ўз автомобилига ўт қўйиб юборгани YouTube орқали 270 минг мартадан ортиқ кўрилди.
Изоҳ (0)