АҚШнинг Техас штатида яшовчи фуқаро Рональд Жексон 12 ёшли қизига машҳур iPhone смартфонидан фойдаланишни тақиқлаганлиги учун судланди. Бу ҳақда маҳаллий ОАВ берган маълумотларга асосан «ТАСС» хабар қилмоқда.
Маълум қилинишича, Рональдни унинг собиқ турмуш ўртоғи судга берган. Бунга биргаликдаги никоҳдан туғилган ва ҳозирги вақтда онаси ва унинг янги турмуш ўртоғи билан бирга яшаётган қизи отасини кўриш учун келганда, ота унинг қўлидаги севимли гаджетини олиб қўйганлиги сабаб бўлган.
Жексоннинг таъкидлашича, қизининг мобил телефонига келган хабарларнинг бири жуда қўпол эканлиги ва қизига салбий таъсир қилиши мумкинлиги сабабли, тарбиявий мақсадда олиб қўйган. «Мен ўзимнинг оталик бурчимни бажардим холос. Фарзандлар ножўя иш қилганда, уларга буни айтиш керак ва керак бўлса, бу ишни қайта такрорламаслиги учун уларни жазолаш керак», ― деди Жексон.
Шунга қарамасдан, унинг собиқ хотини ва унинг полициячи лавозимида ишлайдиган янги турмуш ўртоғи унинг фикрига қўшилмади ва қизнинг ҳуқуқлари поймол бўлганлигини арз қилиб, судга мурожаат қилди.
Чақирув хатига асосан судга ихтиёрий равишда боришни хоҳламаган Рональд, полициячилар томонидан мобил телефонни ўғирлаганликда айбланиб, мажбурий тартибда ҳибсга олинди.
Отага нисбатан олти ойгача қамоқ жазоси ва икки минг доллар миқдорида жарима қўллаш хавфи бўлса-да, суд тақдим этилган далилларнинг етарли эмаслигини баён қилиб, судланувчини айбсиз деб топди.
Жексоннинг маълум қилишича, содир бўлган ҳодиса оқибатида судда унга қарши кўрсатма беришга мажбур бўлган қизи билан ўртасидаги муносабатлар бузилган. «Бунга оддий мобил телефон сабабчи бўлганлигига ишонмайман», ― деди у.
Жексон собиқ турмуш ўртоғи ва унинг янги эрига нисбатан қарши даъво аризаси билан судга мурожаат қилишини таъкидлаб, қизи билан ўртасидаги муносабатларнинг тикланишига умид қилди.
Шу билан бирга, Рональд низога сабаб бўлган телефонни қизига қайтармади.
Изоҳ (0)