Ўзбекистон Давлат рақобат қўмитаси «Навоий кон-металлургия комбинати» (НКМК) томонидан Буюк Британиянинг Villamy LP компанияси тендер савдоларидан асоссиз равишда четлатилгани юзасидан иш қўзғатди. Бу ҳақда қўмита матбуот хизмати хабар бермоқда.
Маълум бўлишича, НКМК поршенли насос агрегатларини етказиб бериш бўйича тендер ташкил этган. Тендер савдолари иштирокчилари таклифлари НКМК ходимларидан тузилган баҳоловчи гуруҳ томонидан кўриб чиқилган.
Баҳоловчи гуруҳ Villamy LP берган таклифни муҳим аҳамиятга эга бўлмаган фарқланишлар асосида тендер ҳужжатлари талабларига мос келмаслиги ҳақида хулоса берган ва тендер савдолари кейинги босқичига ўтказилмаган.
Айни вақтда, шу баҳоловчи гуруҳ тендернинг бошқа иштирокчиси таклифини ҳам кўриб чиққан бўлиб (иштирокчининг номи қўмита ахборотида кўрсатилмаган), унинг ҳужжатлари ва тендер ҳужжатлари шартлари орасидаги фарқлар Villamy LP’нинг таклифидаги фарқланишларга нисбатан муҳимроқ эканлигига қарамасдан, унинг ҳужжатлари кейинги босқичга ўтказилган.
«Қўмита томонидан ўтказилган ўрганишлар натижасида, НКМК томонидан рақобат тўғрисидаги қонунчилик талабларини бузилган деган хулосага келинди. Натижада, НКМК томонидан юқоридаги тендер савдолари бекор қилинди ва қайтадан тендер ўтказиш ҳақида эълон берилди», — дейилади қўмита ахборотида.
Қайд этишларича, НКМКнинг ушбу ҳолатга йўл қўйган масъул ходимлари ўрнатилган тартибда маъмурий жавобгарликка тортилган. Айнан қандай чоралар кўрилганига қўмита ахборотида аниқлик киритилмаган.
Изоҳ (0)